Já nú er ferðalag framundan... Styttist í að við förum "hringinn" eins og gamla daga. Við ættum að geta upplifað ágætis nostalgíu því að við förum með mömmu og pabba, sitjum aftur í og hlustum á mömmu og pabba þylja upp úr vegahandbókinni :)

Mamma segir að hún hafi ekki viljað taka sénsinn með mig og Lárus og hafi því ákveðið að fara með okkur í ferðalag yfir verzlunarmannahelgina - svona til að tryggja að við færum okkur ekki að voða á einhverri skelfilegri útihátíðinni. Mér þykja þetta hins vegar óþarfa áhyggjur hjá henni þar sem fyrsta og eina útihátíðin sem ég fór á  - endaði ekki betur en svo að ég hringdi skælandi heim á laugardagskveldi og bað mömmu vinsamlegast að kaupa far fyrir mig heim frá Eyjum... sem hún gerði by the way EKKI.

En við leggjum af stað á föstudaginn og höldum í austurátt. Ætlum að koma við á Giljum í Fljótshlíðinni og gera tilraun til að láta mömmu verða skotna í kettlingnum Míu. Síðan verður  austurlandið kannað og áð í  Höfn í Hornarfirði um kvöldið. Daginn eftir verður síðan lagt í'ann áleiðis til Kárahnjúka - ýmislegt skoðað á leiðinni (mamma er með planið). Um kvöldið er áætlað að renna inn í Vopnafjörð þar sem sýna á Lárusi æskuslóðirnar, Vígdísarklett, sundlaugina og fleira spennandi. Á leiðinni heim er nauðsynlegt að skoða Dettifoss, Ásbyrgi og fleiri fallega staði.

Hlakka til að skoða landið mitt, koma á Vopnó aftur og njóta þess að vera á ferðalagi...